Գործակալի լիազորություններ

1. Ապահովագրական գործակալի պայմանագրով Գործակալը` Ապահովագրողի կողմից վարձատրության դիմաց, լիազորվում է իրականացնել Օրենքով սահմանված կարգով ապահովագրական միջնորդային գործունեություն` այն է Ապահովագրողի հանձնարարությամբ կամ իր առաջարկությամբ, Ապահովագրողի անունից և վերջինիս հաշվին իրականացնել հետևյալ գործառույթները.

1.1  Ապահովագրության պայմանների պատշաճ ներկայացում հավանական Ապահովադիրներին:

1.2  Ապահովագրության պայմանագրերի (Վկայագրերի) կնքման նախապատրաստական աշխատանքների, այդ թվում` ապահովագրական խորհրդատվության իրականացում:

1.3  Ապահովադիրների և Ապահովագրողի միջև ապահովագրության պայմանագրերի (Վկայագրերի) կնքման կազմակերպում:

1.4 Ապահովագրության պայմանագրերի կատարման օժանդակում, ներառյալ ապահովագրավճարների հավաքագրման իրականացում կամ վերահսկում:

2. Ապահովագրական գործակալի պայմանագրով Գործակալը լիազորվում է ապահովագրական միջնորդային գործունեություն իրականացնել միայն հետևյալ ապահովագրության դասերով.

2.1 Դժբախտ պատահարներից ապահովագրություն (ներառյալ` արդյունաբերական վնաս և մասնագիտական գործունեության ընթացքում ձեռք բերված հիվանդություններ):

2.2 Ցամաքային տրանսպորտի ապահովագրություն (բացառությամբ երկաթուղային):

2.3 Փոխադրվող գույքի (բեռների) ապահովագրություն:

2.4 Հրդեհից և բնական աղետներից  ապահովագրություն:

2.5 Գույքին հասցված այլ վնասներից ապահովագրություն:

2.6 Առողջության ապահովագրություն:

2.7 Ցամաքային ավտոտրանսպորտային միջոցների (նաև` բեռնափոխադրող) օգտագործումից բխող պատասխանատվության ապահովագրություն:

2.8  Աջակցության ապահովագրություն, որը ծածկում է ճանապարհորդության մեջ կամ իրենց մշտական բնակության վայրից հեռու գտնվող անձանց աջակցության տրամադրումը:

2.9  Ընդհանուր պատասխանատվության ապահովագրություն (պատասխանատվության բոլոր այն տեսակները, որոնք ներառված չեն Օրենքի 7-րդ հոդվածի 2-րդ մասի 10-ից 12-րդ կետերով նախատեսված դասերում):

2.10 Ֆինանսական վնասների ապահովագրություն:

3. Յուրաքանչյուր ֆիզիկական անձ գործակալի միջոցով կնքվող ապահովագրական պայմանագրերի հաշվեգրված Ապահովագրավճարների առավելագույն թույլատրելի քանակը մեկ ամսվա ընթացքում կազմում է 20 000 000 (քսան միլիոն) ՀՀ դրամ, իսկ իրավաբանական անձ գործակալի դեպքում 40 000 000 ՀՀ դրամ (քառասուն միլիոն):

4. Գործակալն իրավունք չունի յուրացնել հավաքագրված ապահովագրավճարները:

Վերջին թարմացում` 09.08.2013թ., 09:52